Overcome procrastination - أكاديمية الجويلى
إزاي تحقق أقصى استفادة من اشتراكك في ملتقى توظيفي ؟؟
أبريل 9, 2017
نصائح اقتصادية لن تتوقعها
أبريل 25, 2017
اظهر الكل

Overcome procrastination

المشاركةعلى مواقع التواصل الاجتماعى

اللي حيقروا و مش حيعملوا save للبوست و خلاص , لهم مكافأة فورية في وسط المقال  😉 ..

🎁🎁🎁🎁🎁🎁🎁🎁🎁🎁🎁🎁🎁

في بداية 2010 , قررت أقدم أول دورة Pharmacology أونلاين بالعربي على الإنترنت .. و لكن ده كان معناه إني أحضّر و أصوّر و أمنتج و أحمي ما يوازي ساعتين أسبوعيا , و ده كان بيبقى محتاج شغل 5 ساعات يوميا , غير شغل الصيدلية لمدة 12 شهر على الأقل !! .. .. و برغم إني كنت حاسس إن ده شاق جدا , إلا إني كنت حاسس إنه حيبقى فتحة خير بالنسبة لي , و مفيد جدا للي حيتفرج عليه , .. و عشان كده كنت محتاج حافز قوي , يخلّيني أكمّل شغل في المشروع ده بشكل مستمر .. و هنا ربنا هداني للحل , و هو #حرق_المراكب أو #خلق_وحش_الفزع ..

.

أعلنت عن الموضوع بالفعل , و شرحت إيه اللي حيتم , و فتحت باب الحجز الفعلي , و حطّيت قيمة للدورة , أقل بكتييييير من قيمته الحقيقية .. و اتفقت مع المشتركين إن حيتبعت لهم محاضرة كل أسبوع , طازة بطازة .. و بعون الله , اشترك معايا 4 زملاء .. بحالهم .. اتنين من مصر , و اتنين من الإمارات .. و ده كان كافي جدا بالنسبة لي , عشان أفضل مكمّل , و كل ما يصيبني الكسل أو يراودني التسويف , أفتكر إن الناس دي ليها حق عندي , و لازم أقوم عشان أوفّيه .. , و بفضل الله , اكتملت الدورة بنجاح في 8 شهور بدلا من 12 شهر .. و دي كانت أول محاولاتي الناجحة فعليا للقضاء على التسويف في حياتي ..

.

كلنا عندنا حاجات بنؤجلها لآخر لحظة , برغم مدى أهمّيتها بالنسبة لنا , و لكن عقلنا الكسول بطبعه , بيختار الأمتع و الأريح في أغلب الأوقات , و يرجئ الممل أو الشاق , طالما لسه له وقت .. و على مدار سنين عمري , حاولت أتعلم إزاي أغلب بعبع التسويف ده في حياتي .. و اتعرفت على مئات من التكتيكات و النصايح , اللي مانفعش معايا منهم إلا الـ 9 دول : ..

.

1. اخلق وحش الفزع : 

Create your Panic Monster

.

يقول Tim Urban في واحدة من أفضل الـ TEDx talkss اللي شفتها على الإطلاق , إن عقلنا المأنتخ مش بيتحرك أحيانا , إلا عند اقترابنا من الـ Deadline اللي المفروض نخلّص المهمة عنده , و لكن المشكلة إنه بيفحت نفسه في الفترة دي بالشكل اللي ممكن يخلّي المهمة كلها طالعة بشكل متبهدل أو غير منمق كفاية !! .. بجانب إنه بيفحت أعصابنا اللي بتتحرق من غير نوم لفترة طويلة مثلا قبل ميعاد تسليم المهمة !! .. و برغم إننا عارفين ميعاد الـ Deadline من زمان (أو ما سماه المحاضر #وحش_الفزع ) , إلا إن العقل البشري مش بيتحرك بجد إلا في اللحظات الأخيرة !! .. تقدر تشاهد الفيديو الرائع من هنا https://youtu.be/arj7oStGLkU ..

.

الحل في نظري هو إنك تخلق وحش الفزع الخاص بيك , بشكل مبكر عن وحش الفزع الخاص باللي المفروض يتسلم منك المهمة ..

.

لو المفروض تذاكر3 فصول من المادة اللي امتحانها كمان أسبوع .. بدل ما تؤجلهم لآخر لحظة , ممكن تتصل بزميلك : ..

– ألو .. أيوة ياض .. فاضي نتقابل كمان يومين ؟؟

= اشمعنى ؟؟ ..

– أهو عاوز أجرب معاك حاجة كده ..

= خير .. إيه هي ؟

– عندي 3 فصول حاذاكرهم في الـ 48 ساعة الجايين دول , و حنتقابل و لو سألتني فيهم , و غلطت في 5 أسئلة , حاعزمك ع العشا .. موافق ولا أغيّر رأيي ؟؟

= لا طبعا موافق .. ع البركة ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

2. داري على شمعتك :

Don’t expose your goals

.

ماتفتكرش إنك لما تكتب أهدافك الجاية ع الفيس , حتقدر تحققها بشكل أسهل , أو إن ده حيشجّعك على تنفيذها بحماس و إصرار .. بالعكس , أثبتت الدراسات البحثية قريبا جدا , إن ده بيدّي شعور مزيّف بالإرضاء و بيقلل من احتمالية تحقيقك للهدف نفسه .. و الكلام ده قاله Derek Sivers بوضوح في رائعته Keep your goals to yourself , و تقدر تشوفها من هنا برضه https://youtu.be/NHopJHSlVo4 , و عشان كده اكتب أهدافك ع الورق , أو في بوست ع الفيس يكون Only me زي ما انت عاوز , و لكن قاوم رغبتك الجامحة في إعلانها للناس , ..

.

مفيش مرة كتبت فيها إني عاوز أخسّ , و بدأت في الدايت فعليا , إلا و فشلت في زمن قياسي للأسف !! .. و أطول مرة واظبت فيها (كانت أسبوعين) , كانت بيني و بين نفسي , لإن كلمات المباركة و التهنئة ماجاتش قبل ميعادها الحقيقي , و هو لما أخسّ فعليا .. و عشان كده , أنا برضه مش حاقول أنا ناوي أبدأ دايت جديد إمتى 😉 ..

.

باحترم جدا اللي ييجوا لنا لاقتناء الباقة يدا بيد , و لما نوصل للختام و التقاط #سيلفي_الباقة , ألاقيهم يقولوا لي : بس بلاش حضرتك تنشرها دلوقتي ع الفيس .. خليها لما ننتهي من المحتوى أولا !! .. ساعتها باقول إن المبدأ موجود عندهم بالفطرة , و على رأي مصطفى خاطر : أسوأ الاحتفالات هي اللي بتبدأ قبل ميعاد الحفلة نفسها ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

3. تخيّل خط النهاية :

Visualize the endline

.

من أهم التمارين اللي كنت باحفّز نفسي بيها قبل المحاضرات المهمة , اللي محتاج أحضّر لها محتوى جديد و ضخم , هو إني كنت باجي كل ليلة , قبل النوم مباشرة , و أتخيّل كل التفاصيل الممكنة , اللي ممكن تحصل مع ختام المحاضرة بالفعل , لمدة 5 دقايق , ابتداء بنظرات الحاضرين , و استمتاعهم بالمحتوى و طريقة التقديم , و سلام الضيوف من كبار الزوار بعد انتهائها , بل و التقاط #سيلفي_المحاضرة مع كل الحاضرين .. و هكذا , بالشكل اللي بيخلّيني أقوم تاني يوم و انا متقد بالحماس لإنهاء الجزء المطلوب مني إكماله بإذن الله ..

.

انت كمان ممكن تتخيل هيئتك و انت خارج بسعادة من لجنة الامتحان بعد تسليم ورقة الإجابة , أو سلام الدكتور ليك بتهنئة , بعد ما يمتحنك شفويا , أو تحط صورة بالفوتوشوب ليك كخلفية للكمبيوتر , بعد تعديل وزنك للوزن المطلوب .. كل ده حيساعدك ع الالتزام بخطتك لتحقيق الهدف بإذن الله ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

4. قسّم الهدف الكبير إلى أهداف صغيرة : 

Divide it into small milestones

.

الـ Milestonee معناها بالفصحى “مَعْلَم” , و لكن معناها المقصود هنا “علامة فارقة 🚲 في الطريق” , ممكن تحسّسك لما توصل لها , إنك مشيت شوية حلوين , و حققت جزء من الهدف بشكل واضح ..

.

في جرد الصيدلية الشهري , مش بامشي بالحروف ولا التواريخ .. أنا بامشي بالدواليب .. بحيث إني في نهاية اليوم , لما ألاقيني خلصت جرد دولاب بحاله , باحس بالإنجاز , و ده بيشجّعني على الاستمرار في اليوم التالي عشان أجرد الدولاب اللي بعده و هكذا .. لكن لو كنت بابص ع الصيدلية كلها على إنها محتاجة تتجرد , ده كان ممكن يحسسني بمدى كبر المهمة بشكل يخليني أكسّل عن القيام بيها , أو أؤخرها لآخر لحظة من اليوم , أو الأسبوع المخصص للجرد !! ..

.

أثناء مشاهدة محتوى باقة Learn Pharmacy At Home , حدد اللي ناوي تخلصه على مدار يوم أو اتنين مثلا .. و ما تحدّدش هدف ضخم لفترة طويلة , و لكن هدف أصغر لفترة أقصر .. ما تقولش أنا حاخلّص الـ 16 ساعة بتوع دورة OTC As It Should Be في أسبوعين .. و لكن قول إنك حتنتهي من محتوى أول يوم فيها , قبل نهاية الأسبوع ده .. و هكذا ..

.

ماتنساش تكافئ نفسك 🎮 , أو تخلّي حد يكافأك كتشجيع لو خلّصت الجزء ده من المهمة , عشان يشجّعك على إكمالها ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

5. ابدأ بالأسهل , و لمدة 7 دقايق بس ..

Start with easy parts , just for 7 minutes

.

من أهم الخدع اللي ممكن تلعبها على عقلك , إنك تقنعه بإنك بالبدء في المهمة , فانت كده مش بتعمل حاجة معقدة أو مرهقة , بدليل إنك حتاخد أسهل جزء فيها , و تعامل معاه زي الطفل الصغير , لما تقول له : طب دوق سندوتش المربى ده , و لو ماعجبكش , ماتكملهوش .. نفس الفكرة , اقنع عقلك , بإنك حتجرب نفسك في المهمة لمدة 7 دقايق بس , و التزم بإنها لو ما عجبتكش , حترجع تنام تاني أو تتفرج ع التليفزيون , أو تعمل كل اللي كان بيمتعك اكتر .. و لكن مين عارف ؟؟!! .. مش جايز العجلة تدور , و الشغل يشدّك و تلاقي نفسك كملت ساعة و اتنين من غير ما تحسّ ؟ .. ياما حصلت على فكرة .. الخدعة دي مشروحة تفصيليا في أحد أهم حلقات برنامج أسلوب osloop , و تقدر تشوفها هناhttps://youtu.be/tuAOFYX8_fI ..

.

عن نفسي , بقيت بالاقي صعوبة في إني أفصل نفسي عن الشغل , عشان أقعد مع زوجتي و ابني , و أصبح ده من الواجبات اللي باؤجلها كل شوية , و أعترف إن ده غلط , و عشان كده باستخدم التقنية دي حاليا , و أقول لنفسي إني حالعب معاه مثلا لمدة 7 دقايق , و بأسهل لعبة , اللي مافيهاش تنطيط أو مجهود كتير و بعدها نشوف .. و هو بيقبل بلا تردد , و غالبا الحيلة بتنجح معايا و معاه , و بنكمّل لعب لفترة أطول , و بنخربها حرفيا =D , و بيكون وقت ممتع للجميع بفضل الله ..

.

بالنسبة لك , ممكن لما تروح الجيم , تبدأ بأسهل لعبة , أو تتمشى ع التريدميل شوية .. و تقنع نفسك إن لو الجو ما عجبكش , ممكن تمشي و ما ترجعش تاني .. و لكن أنا واثق إنك حتكمل , عشان الـ endorphins حتطلع و تسبب لك إحساس غريب بالسعادة , يخليك حابب تزوّد أكتر .. بس المهم تعوّد نفسك ع الكلام ده في أول أسبوع .. و بعد كده , انت حتلاقي نفسك عاوز تقضي فترة أطول ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

6. امزجها بالمتعة قدر الإمكان ..

Mix it with fun , as much as possible

.

هيئ مناخك للعمل باستمتاع .. ولّع بخور .. اعمل كوباية الشاي المحترمة .. نظّم مكتبك .. شغّل موسيقى هادية في الخلفية 🎹 .. كل ده حيشجّعك على إنك تقوم بالمهمة ببال رايق .. و لو قدرت تخلّي المهمة نفسها ممتعة , ما تترددش , حتى لو حتخسر على كده جزء من وقتك و مالك ..

.

عن نفسي , لما باحب أعمل workoutt في البيت , باختار فيديو تكون حركاته ممتعة و معاها خلفية موسيقية حماسية , و المدربين فيه مبتسمين و مبهجين , و باشغّل كل ده ع الـ LED بعد ما كل البيت ينام , و البس الترنج الرياضي , و ده بيساعدني ع الالتزام بالكلام ده بشكل شبه يومي .. بس والله بقى لي كتير ما عملتش الحركة دي , ادعوا لي أرجع لها تاني .. و ع العموم , الفيديو أهو , موجود مجانا ع الـ  YouTube ..

https://youtu.be/2ccc_bgR4DA

.

بالنسبة لك بقى , فدي تعتبر رسالتي , اللي ربنا جعلها سبب في نجاحنا كـ Pharmaceutical Instructors في الأكاديمية , ألا و هي إن كل اللي بنقدمه , بنتعمد إنه يكون ممزوج بالمتعة في كل لحظة فيه .. سواء لايف أو أونلاين , بنقصد إننا نخليك تضحك , عشان المعلومة تكون سهلة الهضم بالنسبة لك , و تقدر تكمّل حضور معانا لـ 4 ساعات لايف , أو أكتر منهم أونلاين أحيانا !! .. و في الحالة دي , مهمة حصولك ع المعلومة التطبيقية , مش بتكون رخمة بالنسبة للعقل , و لكن محببة و مرغوبة , بالشكل اللي يخليك تضحّي بتنفيذ مهام تانية أصلا , في مقابل استمتاعك بالمحتوى اللي بنقدمه .. هذا من فضل ربي .. من دلوقتي #ملكش_حجة في تأجيلك لتطوير نفسك علميا و مهنيا ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

7. فوّض

Delegate 

.

المهمة اللي ماتقدرش تقوم بيها , فوّض لها أحد المخلصين من اللي حواليك .. انت مش بتملك مالك و بس .. انت كمان بتملك وقتك و مجهودك .. و ممكن ببساطة توفّر جزء من وقتك و مجهودك لحاجة تانية ممكن تقوم بيها , لو فوّضت حد عشان يقوم لك بمهمة , في مقابل مبلغ مالي .. و ممكن ييجي أكتر منه من خلال وقتك و مجهودك اللي وفرتهم ..

.

في مارس 2015 , بعد ما جمّعت مواضيع كتابنا الشهير #حوارات_صيدلانية , كان مطلوب مني إني أتعلم مهارة تصميم الكتب و المجلات من الصفر , باستخدام برنامج Adobe InDesign , و لكن ربنا هداني للبحث عن مصمم حر (أو Freelancer Designer ) متخصص في القصة دي , و فعلا انتهى من التصميم في زمن مناسب , و بقيمة 1500 جنيه , لإخراج الكتاب بشكل رائع , تقدر تتصفحه #مجانا من هنا https://goo.gl/iJiSCX ..

.

بالنسبة لك , ممكن تكون علمت إن حاليا فيه #خصم_المبادرين الموجود عند حجز دورة Gewebiotics بإذن الله .. و لكن ممكن تكون قررت تؤجل اتخاذ خطوة الحجز , لحد إجازة الصيف !! .. برغم إن ساعتها ممكن يكون عدد النسخ المتاحة نفد !! .. دلوقتي تقدر #تفوّض_صاحبك بإنه يحجز لك معاه خلال فترة الخصم , لو كان مشوار الحجز لأقرب مكتب بريد , بالنسبة لك تقيل أو بعيد !! ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

8. صلّي في أول الوقت 

Pray early as possible

.

من أهم عوامل #البركة_في_الوقت هو إنك تصلّي بمجرد ما تسمع الأذان , و ثق في إنك لو صلّيت في المسجد , ربنا حيبارك لك في الوقت التالي لصلاتك , أكتر من لو صليت في بيتك .. أصلها قاعدة !! .. أول ما تلاقي الوقت بيضيع من بين إيديك , اعرف إنك ماعطيتش ربنا حقه منه .. و نفس الكلام بالمناسبة ع المال أو الصحة أو أي حاجة ..

.

في الفترة اللي صديقي فيها التزم دينيا , و بدأ يصلّي بانتظام , لاحظت نجاحه على المستوى الدراسي بشكل ما لقيتش له تفسير , إلا لما لقيته بيخرج من صلاة الفجر , و معاه ملزمة كان فاتحها بيقرا فيها على رواقة , و هو راجع البيت !! .. عرفت ساعتها إن ربنا بارك له في وقته بالشكل اللي خلاه يقدر يلحق نفسه في المناهج في آخر شهر ..

.

انت كمان , تقدر تكتشف مفهوم البركة في الوقت لما تلاقي نفسك بتقدر تقوم بكذا مهمة في نفس الوقت , من خلال مصطلح #استثمار_الوقت , و فيه ما يوازي كورس كامل #مجانا عن الموضوع ده , حنقدمه لحضرتك لو قمت بنشر البوست ده عندك public , و بعتت لنا Screenshot منه و هو عندك في رسالة على خاص صفحة Gewebiotics , و تحتها الكود ده TimeInvv .. مش أكتر من كده .. بالمناسبة , تقدر تعتبر دي الجايزة الخاصة , لكل اللي وصلوا في البوست لحد المنطقة دي , و ما عملوش save له من الأول بمنتهى التسويف برضه =D !! ..

.

˙·٠•●♥ Ƹ̵̡Ӝ̵̨̄Ʒ ♥●•٠·˙˜”*

9. امنع المشوشات 👀

Remove distraction

.

الصح إنك تنتبه لوقتك اللي بيضيع في اللاشىء أو ع الهدر السلبي لطاقتك ماديا و معنويا !! .. و عشان نساعدك على كده , بندلّك على تطبيق رائع , اسمه Forest تقدر تحمله على موبايلك , من هناhttps://goo.gl/vplDEH .. و لما حتحمّله عندك حتذهل بفكرته العبقرية ..

.

في فترة من الفترات , قررت إني حامنع نفسي تماما عن مواقع التواصل الاجتماعي , من باب توفير الوقت اللي بيضيع عليها , استجابة لعدد كبير من البوستات اللي شفتها عليها أصلا =D .. الشاهد إني حسّيت – على عكس الآخرين – بإن إنتاجيتي بدأت تقل , و ده لإني اكتشفت إن استخدامي لمواقع التواصل كان في أغلبه مفيد , مش ضار , بين بحث عن معلومات مفيدة , أو اطمئنان ع الأصدقاء و المقربين , أو اطلاع على الأحوال العامة , أو حتى مشاهدة لفيديوهات مضحكة أو ممتعة .. كل ده مش بنحتاج نسيبه لفترات طويلة , لإننا بكده حنبقى كإننا بنرجع بنفسنا لعصر ما قبل التكنولوجيا ..

.

و لكن الصح – في رأيي – هو إننا ندي لكل حاجة وقتها بالعقل , و ساعة لما نقرر إتمام مهمة معينة , نقفل الـ notifications الخاصة بالموبايل , زي ما بنطلب من المدام إنها توفّر لنا الجو الهادي عشان المقالات اللي زي دي تخرج للنور في وقت قياسي , أو زي ما بنطلب من اخواتنا الصغيرين إنهم ما يعملوش دوشة أثناء وقت المذاكرة .. و لكن أكيد مش بيبقى الحل إننا نقطع رقبتهم إلى الأبد .. وصلت الفكرة ؟؟ ..

.

♪♫•*¨*•.¸¸¸¸.•*¨*•♫♪

بكده أكون خلّصت المقال , و أرجو إنه يكون عجبك و أفادك 💎 .. و لو ده حصل , يا ريت تقول لنا في الكومنتات برضه 😉 ..

.

#اتعلم_صح_باستمتاع

#المجد_للمبادرين

#أحبكم_في_الله

.

أحمد الجويلى

التعليقات
المشاركةعلى مواقع التواصل الاجتماعى