قواعد الشفوي الأربعون - أكاديمية الجويلى
دليل الطفشانين من صيدلة | ممكن تشتغل كده لو صيدلة ما نفعتش معاك
مارس 24, 2016
Gewebiotics ( OTC of infections )
يونيو 3, 2016
اظهر الكل

قواعد الشفوي الأربعون

المشاركةعلى مواقع التواصل الاجتماعى
 

‫#‏قواعد_الشفوي_الأربعون‬ ..
.

1. الشفوى تجربة صعبة إلا على اللبقين فى مهارات التعامل ..
2. لو عندك رهبة مرضية من الموضوع ، خد حبة انديرال 10 مجم قبل اللجنة بساعة مثلا ، للسيطرة على خوفك شوية

5.png
3. اسأل عن الدكتور اللى حتدخل له ، و اعرف أكبر قدر من المعلومات عنه ..
4. مش معنى إن الدكتور بيشرح جزء معين ، إنه ممكن مايسألكش فى أجزاء تانية
5. الاكسترنال نعمة من ربنا ، عشان مش بيكونوا عارفين اللى انت درسته بدقة زى الدكتور اللى شرحه ..
6. اوعى تدخل لدكتور دخل لك المدرج ، و انت ماتعرفش شكله او ماحضرتلوش قبل كده
7. طريقة إجابتك و ثقتك بنفسك أثناء عرضها ، أهم من الإجابة نفسها
8. امتحان الشفوى نفسه هدفه قياس و تطوير خبراتك فى التعامل مع الآخرين و العمل تحت ضغط بشرى ، مش مع ورقة و قلم ..
9. ماتخافش من أساطير الطلبة قبلك بخصوص دكتور معين .. الدكاترة مش فامبايرز .. و ممكن يشدوا عليك شوية عشان يجيبوا آخرك بس ، و بعد كده الدرجة بتبقى حلوة ..
10. ركز فى نطق الكلمات الانحليزية زى ما الدكتور بينطقها ، .. النقطة دى بتفضح و غالبا الدكتور ممكن يغفر أى حاجة غيرها ..
11. لما الدكتور يسألك على الجزء اللى انت اشطر فيه ، ماتعملش فيها “أبو العريف” بأنك تقول لك انك شاطر فى المنهج كله .. حينفخك

2.jpg
12. حاول ما تدخلش باجابتك فى مناطق مظلمة بالنسبة لك .. عشان ماتتزنقش .. خليك فى البراح
13. لو حبيت تفتكر ، ماتسكتش .. املا الوقت بجمل بسيطة ، لحد ما ذاكرتك تسعفك بالاجابة ، زى “إجابة السؤال ده بسيطة ، و كانت فى الشابتر الرابع اللى شرحته د. فلانة .. و الإجابة هى …..
14. اوعى تفتى .. كلمة “بصراحة مش فاكر الاجابة” أهون من الفتى ..

3
15. لو الدكتور بيدخل اتنين باتنين ، بلاش تدخل مع الدحيح .. “ابعد عن حيحا” ..

1.jpg
16. لو الدكتور طلب منك تسأل زميلك سؤال ، ماترخمش عليه حتى لو ماتعرفهوش .. الرحمة حلوة
17. اوعى تسأل عن درجتك و انت خارج .. دى قلة ثقة بالنفس ، و ممكن تنقصك ..
18. الابتسامة العاقلة الواثقة كنز ، تساوى درجات كتير
19. اهتم بمظهرك بس من غير أفورة ..
20. اهتمى بمظهرك ، .. بس ماتفتكريش إن الدرجات بتتناسب طرديا مع عدد طبقات الميك اب ، او درجة نعومة الشعر أو .. ولا بلاش ..
21. إياك و السيجارة او ريحتها ..
22. إياكي و اللبانة .. المستيكة يعنى ..
23. بلاش سياسة .. أصلها مش ناقصة يعنى ..
24. الشفوى مش نهاية العالم .. بس ماتستهونش بيه
25. ابعدي عن التمثيليات الحمضانة .. حتتفقسى ، و الدكاترة مش ولاد امبارح .. و الانهيار العصبى المزيف بقى بيحصل فى اللجنة الواحدة ، تمناشر مرة
26. ماتزعلش لما زميل فاقد يدخل للدكتور جنبك ، و يقول له “يا عمو” نتيجة علاقات عائلية سابقة ، فياخد الدرجة النهائية بسبب “عمو” .. هو ممكن ينجح فى الكلية .. لكن نجاحك انت منتظرك بعدها فى الشغل ..
27. كل ما علاقتك كانت أقوى بدكاترتك قبل الامتحان فى نشاطات و اتحاد و جامعة علمية و كده ، زادت فرص اجتيازك للامتحان الشفوى و انت ما زلت على قيد الحياة ..
28. ادعى دايما : اللهم ثبتني بالقول الثابت فى الحياة الدنيا و فى الآخرة ..
29. ماتزعلش الست الوالدة قبل ما تنزل البيت .. دعوتها بالشفا على فكرة !
30. مفيش قاعدة معينة للتوقيت الانسب لدخول اللجنة .. كله حيدخل اللجنة .. و كله حياخد درجاته ..
31. اوعى تدخل بهدية من اى نوع .. ممكن تعتبر رشوة و تبقى سنتك سودا ..
32. بلاش اختلاق أعذار واهية و أسباب مزيفة منعتك عن المذاكرة .. دى بتبقى شحاتة مقنعة ..
33. ادينى درجة حلوة و حاخلى أمى تدعى لك .. دى شحاتة ع المكشوف بقى .. (خليها تدعى لك انت)
34. بلاش حظاظات ولا بنطلونات مقطعة .. عشان الدكاترة بتتقمص ..
35. خلى صوتك واضح و كلماتك باينة ، عشان ماتضطرش الدكتور يكمل الاجابة من دماغه ..
36. نظرتك تكون فى عين الدكتور أثناء الإجابة .. مش للسقف ولا جزمتك ولا لمتابعة البرص اللى ماشى ع الحيطة ..
37. سلم عليه بايدك و انت داخل و خارج .. (أو سلمى عليها) ..
38. ماترميش نفسك فى التهلكة بأنك تدخل ورا طالب لسه متهزأ و مطرود من اللجنة ..
39. ماتراجعش اجاباتك مع حد بعد خروجك .. مش حيفيد بحاجة ..
40. بعد خروجك ، على بيتك عدل ، للاستعداد للمادة الجاية ..
.
بالتوفيق يا أبطال .. و ماتبخلوش على زمايلكم بالنصايح دى لو أفادتكم .. ‫#‏شير‬ بقوة .. و انتظروا مفاجآتنا القادمة ع البروفايل ‫#‏قريبا‬ بإذن الله
.
أحمد الجويلى

التعليقات
المشاركةعلى مواقع التواصل الاجتماعى