معلومات سريعة عن مرض الصدفية - أكاديمية الجويلى
طريقة رائعة تجعلك تكره التدريب الصيدلى بالإجازة
فبراير 1, 2014
التعامل المحترف في الصيدلية
فبراير 19, 2014
اظهر الكل

معلومات سريعة عن مرض الصدفية

المشاركةعلى مواقع التواصل الاجتماعى

الصدفية مرض جلدى .. ذاتى المناعة .. يعنى الجسم و مناعته هى اللى بتكون السبب فيه .. خلايا الـ T-Cells الموجودة تحت الجلد فى مناطق معينة , بتبدأ تخلى خلايا الجلد تنمو بشكل سريع , و تكمل دورة نموها بشكل غير طبيعى فى 7 أيام , بدلا من 28 يوم .. فالجلد يظهر بشكل غير ناضج لدرجة كافية , و يكون فيه ألم و فوقه قشور بيضاء و ممكن يكون فيه هرش أحيانا ..

مرض الصدفية ممكن يظهر فى أى عمر .. و لأى جنس , و بأى درجة فى أى وقت للأسف .. و عشان كده , لازم نلتزم بإنه مرض غير معدى , و نبنى على ده إننا من المحبب إننا نسلّم على المريض بإيدينا بشكل قوى , لتعويضه عن الشعور بالألم النفسى اللى بيحسّ بيه لما الناس بتتجنب إنها تسلّم عليه لما تشوف إيديه عاملة إزاى بسبب المرض , و يفتكروا إنهم ممكن يتعدوا منه ..

5c8e73d7812ec4de68fc70f7464b826d

الصدفية أنواعها كتير جدا .. و ممكن تظهر فى أماكن مختلفة فى الجسم .. و لكن الشائع إنها بتظهر فى الأماكن اللى فيها احتكاك أكتر .. و مع كده , ممكن نلاقيها بتظهر فى فروة الراس , أو داخل قناة الأذن , فى حالات نادرة .. و تشخيصها بيكون صعب فى الحالات اللى زى دى ..

الصدفية مرض مناعى .. و عشان كده , ممكن الأطباء يضطروا لاستخدام مثبطات المناعة المختلفة , و على رأسها الميثورتريكسات , للسيطرة على حدة المرض أحيانا .. و لكن دى مش الحالة اللى يتم التصرف فيها صيدلانيا , دون استشارة الطبيب .. الحالات الأهون من كده , ممكن نتصرف معاها بحرص عن طريق النصايح اللى حنقولها فى الآخر , بجانب استخدامنا لبعض الدهانات المميزة , اللى جابت نتيجة مع عدد كبير من المرضى ..

من أهم الدهانات دى , “ألوريد” , و اللى اخترعته د. أغاريد الجمال .. من مصر .. و متواجد بالسوق المصرى بقيمة 16 جنيه بس .. و فيه صمغ عسل النحل , بجانب مستخلص الصبار .. و دول لهم تأثير مذهل على بقع الصدفية الموجودة فى الجسم بإذن الله ..

الصدفية ممكن تمتد – لو لم يتم علاجها بشكل صحيح – لحد ما توصل للمفاصل , و تعمل حاجة اسمها psoriatic arthritis , بتكون خطيرة جدا , و تشابه فى شكلها مرض الروماتويد , لتشابه السبب المرضى بينهم ..

الصدفية علاجها – زى ما قلنا – المفروض يستمر مدى الحياة .. و عشان كده , حابين ننبه ع النصايح اللى المفروض نقولها للمريض , و هى :

أولا : المريض لازم يرتّب نفسه على إن المرض مزمن إلى حد ما .. يعنى مش زى دور البرد اللى ممكن يخف منه بعد يومين تلاتة , بجانب إن علاجه بياخد وقت لحد ما يجيب نتيجة .. و عشان كده , لازم نقول له : بلاش يأس .. و الامل فى الله دايما موجود ..

ثانيا : ممنوع على المريض منعا باتا استخدام الكورتيزونات .. د. حامد عبد الله (أستاذ الجلدية و الذكورة بالقصر العينى) – الله يمسّيه بالخير – كان دايما بيقول ان استخدام الكورتيزونات الموضعية للصدفية غلط خالص .. أما استخدامها على هيئة أقراص بالفم , مع مريض الصدفية , فهو جرييييييييمة ..

ثالثا : جفاف الجلد عامل من عوامل زيادة حدة المرض .. كل ما كان الجلد رطب بشكل سليم , حنلاقى الشفاء بييجى أسرع بعون الله .. و ده من خلال حاجتين , أولهم الحفاااااااااظ على شرب الميّة بشكل منتظم و كااااافى لترطيب الجلد من الداخل .. يعنى 2 لتر ماء يوميا أو أكثر .. و ثانيهم تجنب تعرض الجلد من الخارج للماء و إنها تتبخر من عليه بدون تنشيف سريع بفوطة ناعمة ..

رابعا : استخدام الكريمات المرطبة , أيا كان سعرها , شىء مهم جدا و مفيد لمريض الصدفية , للحفاظ على ترطيب الجلد زى ما قلنا ..

خامسا : التعرض المنتظم لأشعة الشمس النافعة (اللى بتكون قبل الظهر , أو بعد العصر) .. عشان نقلل (بالأشعة فوق البنفسجية) من نشاط الخلايا الموجودة تحت الجلد , و اللى بتسبب زيادة نموه بشكل غير سليم , ..

سادسا : الاهتمام بالحالة النفسية .. دايما بنقول لمرضى الصدفية اللى بيتابعوا معانا : كل ما تكون مبسوط , تلاحظ إن المرض بينحسر .. أما لو اكتأبت , فتأكد إن المرض حيكمّل عليك لا قدر الله ..

شوف الفيديو ده , عشان الدنيا توضح أكتر قدام عينيك إن شاء الله

 

فى نهاية كلامنا , حابين نكون قدّمنا حاجة جديدة بخصوص الصدفية , و يا ريت تشوف رسالتنا المصورة عنها , من داخل صيدليتنا من هنا

و لو عجبك الكلام .. ما تنساش تضغط شير , قبل ما تمشى بقى ..

تحياتى ..

د. أحمد الجويلى

التعليقات
المشاركةعلى مواقع التواصل الاجتماعى