لو نويت تفتح صيدلية , اقرا الكلام ده أولا - أكاديمية الجويلى
نصائح اقتصادية لن تتوقعها
أبريل 25, 2017
إزاي تحول الـ OTC Skills بتاعتك إلى Cash Cow داخل الصيدلية ؟!! .. في 3 خطوات بالأمثلة العملية
يونيو 8, 2017
اظهر الكل

لو نويت تفتح صيدلية , اقرا الكلام ده أولا

Image processed by CodeCarvings Piczard ### FREE Community Edition ### on 2016-01-28 08:38:43Z | |

المشاركةعلى مواقع التواصل الاجتماعى

لو نويت تفتح صيدلية , اقرا الكلام ده أولا .. و ربنا يستر  ..

الكلام ده يعتبر نتاج جلسة Pharmaceutical Career Coaching لأحد زملائنا الأعزاء , اللي قرر – و ربنا يكون في عونه – إنه يفتتح صيدليته الخاصة في الأيام الجميلة اللي بتعيشها المهنة حاليا , بعد ما لقى إن ده أفضل خيار له كخطوة مميزة في الـ career الخاص بيه .. و سألني : تنصحني بإيه ؟!! ..

.

قبل ما تقرا , تأكد إن قراءتك لعناوين النصايح بسرعة , ممكن تفيدك , و لكن ده حيكون بنسبة 20% من جملة الإفادة المقصودة , و عشان كده , حاول النهاردة تقرا كلمة كلمة , لإن الكلام حيكون مركز و دسم بإذن الله ..

.

1- تواجدك أهم من تواجد الدوا : 

.

خدعوك فقالوا “أهم حاجة في الصيدلية هي وجود الدوا متلتل و باظظ قدّام عيون الزباين” .. صدقني دي خدعة و خطأ شائع .. و ياما صيدليات اتفتحت و اتقفلت بسرعة , لإن أصحابها طبّقوا المقولة دي حرفيا , من غير ما يقيسوا حجم #الفجوة_الاقتصادية ولا يدرسوا طبيعة السوق اللي حيفتحوا فيه صيدليتهم .. و عشان كده بنقول إنك لو – في فرش صيدليتك – جبت من كل نوع رخيص 5 علب , و من كل نوع متوسط السعر 3 علب , و من كل نوع غالي نسبيا , علبة واحدة , فانت كده فلة شمعة منوّرة , بل ممكن تعتمد على إنك توفّر الأصناف الغالية لما تنطلب , لحد ما تعرف إيه اللي ممكن يتسحب و إيه اللي ممكن يركد في حجرك و ما يتصرفش لا قدر الله !! .. ما تسمعش كلام اللي يقول لك “الدوا ع الرفوف مش بياكل ولا يشرب” , لمجرد إنه يشجعك على إنك تشتري منه و خلاص ! .. ساعتها قول له ” فعلا , بس له تاريخ صلاحية , ماقدرش أغيّره” !! ..

.

و على جانب آخر , لو بتفتح في منطقة شعبية مثلا , اختار العروض اللي ممكن تفرق معاك بشكل كبير , .. لكن على العكس , ركّز في عروض الـ cosmetics الغالية , لو حتفتح في منطقة راقية , .. فهمت قصدي ؟!! ..

.

2- استثمر وقت فراغك علميا :

.

من أحد أهم الحاجات اللي لازم تستغلها أول ما تعمل الافتتاح المتين , هو الوقت الفاضي اللي حيكون متوفر عندك , لحد ما الصيدلية تتعرف بجد , و الرجل تاخد عليها .. الوقت ده ماينفعش تقعد تبص فيه ع الرفوف و خلاص .. و لا ينفع تروّح البيت و تقفل بدري .. و عشان كده , طالما قاعد قاعد , دخّل نت في الصيدلية , و اتعلم في كل دقيقة معلومة جديدة .. بلااااااااش نت .. كتابك الجميل في إيدك , و ارمي عينك جواه , و اطلع بزتونة حلوة للمريض اللي حيدخل بعد شوية بإذن الله .. و الكتب و الفيديوهات على قفا من يشيل ..

.

تقدر تبدأ بكتاب Emtyazology أو Medical Essentials ..

أو بسلسلة الفيديوهات دي https://goo.gl/m2uaWJ ..

.

3- ابني قاعدة ثقة مع الناس :

.

أرجوك ما تتعاملش مع اللي داخلين لك على إنهم مجرد “زباين” أو “عملاء” .. ابني علاقات معاهم , و اتعرف عليهم , و اعرف ساكنين فين , و استكشف الأمور المتشابهة بينك و بينهم , حتى لو كنتوا بتروحوا نفس المطعم , أو بتقعدوا على نفس القهوة .. و اتعلم إزاي تحفظ أسماء عملائك .. (العبقري Ron White ممكن يعرّفك الطريقة لكده , من هنا https://youtu.be/8weFiPGFObk ) .. من أجمل المشاعر اللي ممكن يحس بيها العميل , لما يدخل عليك الصيدلية , فيلاقيك فاكر اسمه من المرة اللي فاتت ..

.

انسى بقى قواعد #خدمة_العملاء (الرخمة) اللي بتنص ع الابتسامة المصطنعة , و التعامل البارد اللزج مع أي حد , و لو عاوز تتعلم الموضوع ده بجد , اسمع للعقلاني Shep Hyken , و ادعي لي ..

.

4- اوجد مبلغ للحرق في البداية : 

.

المولود الجديد , وزنه بيقل ربع كيلو في أول أسبوع من بعد ولادته .. من الطبيعي برضه إن صيدليتك ما تكسبش المكاسب اللي كنت متوقعها في أول أسبوع أو شهر من بعد ما تفتح مباشرة , من الطبيعي إن الناس تتوجّس من الحاجة الجديدة , لحد ما يثقوا فيها .. و في الوقت ده , لازم تكون محضّر المبلغ اللي تقدر تتحمل بيه الخسارة المؤقتة دي .. يعني ما تفتحش صيدليتك و انت ع الحديدة , .. و على رأي الأستاذ الجليل د. Ehab Mesallum , في محاضرته عن #خرافات_تدمر_الشركات , لما قال “لو الفلوس الاحتياطية دي مش موجودة , يبقى تتوجد من قبل ما تفتح مشروعك أصلا” .. تقدر تستمتع بالمحاضرة كلها من هنا https://goo.gl/F7Kcb2 ..

.

5- عشان خاطري بلاش قروض : 

.

“الشيطان يعدكم الفقر” .. و الاقتراض شىء مغري جدا , لإنه بيقدم لك سيولة مادية سريعة في وقت قصير , و لكن بمجرد إتمام القرض و فتح الصيدلية , بتبدأ تشيل هم كيفية سدّ الدين اللي عليك , حتى لو بعد عشرات السنين , و تلاقي نفسك مش عارف تحط راسك ع المخدة بالليل و انت مرتاح .. عشان كده , لو مفيش معاك سيولة , #شارك حد من أصدقائك أو أكتر , و افتحوا صيدلية واحدة كبيرة , بدل ما كل واحد فيكم يفتح صيدلية صغيرة و تنافسوا بعض بدون داعي !! .. و موضوع الشراكة ده , اتكلمنا عنه أكتر هنا (  http://wp.me/p9ibpe-f4 )

.

6- خلي ضهرك للحيط : 

.

اقنع نفسك بإن الصيدلية هي مصدر أكل عيشك الأساسي و الوحيد .. يعني ماتفتحش الصيدلية و انت حاسس إنها مجرد تجربة , و لو ما جابتش همها , ممكن تبيعها أو تتخلص منها , و تشتغل في حاجة تانية .. اقنع نفسك إن النجاح هو البديل الوحيد عندك , و مفيش بديل غيره , .. أجّل التفكير في كل البدايل التانية اللي ممكن تشتغل فيها .. و تأكد إنك لو عطيت الصيدلية من وقتك و مجهودك في الاتجاه الصحيح , حتلاقي الثمرة في الوقت المناسب بإذن الله ..

.

7- قيس رضا عملائك : 

.

باستغرب جدا , لما أتواجد في صيدلية حد , في أحد جلسات الـ Coachingg , و ألاقي الناس داخلة الصيدلية , من غير ما تطلع بحاجة تانية غير الدوا !! .. تعرف حد من زملائك عمل Satisfaction Survey لعملاء صيدليته ؟؟!! .. لا أعتقد ذلك !! .. ليه ما تكونش انت أول واحد يقوم بكده ؟؟!! .. اطبع ورقة مش حتكلفك 10 صاغ , و خلي العميل يملاها و يرجعها لك , لما ييجي لك تاني , أو يحط إجاباته على رابط موقع #صراحة بتاعك !! .. مش عيب على الإطلاق إننا نتعامل مع العملاء بشياكة و محاولة لإرضائهم , طالما مفيش تعدي على كرامتنا ولا إهانة من أي نوع .. و ماتنساش تحتفظ ببيانات عملائك اللي حيملوا الـ Survey لإن دول كنزك الثمين ..

.

8- جهز صيدليتك بإبهار : 

.

انت مش بتفتح صيدلية كل يوم .. و عشان كده لما تفتح صيدليتك حاليا , حاول ماتسترخصش في وسائل إبهار العملاء من حيث الشكل العام و الديكور و الأرضيات و النضافة و الإضاءة .. و هكذا .. فيه شركات متخصصة في الكلام ده حاليا , و في معرض Pharmacy Expo – Egypt اللي فات , شفنا منهم كتير , و بصراحة , من أكتر الشركات اللي عجبني شغلها المعروض كان RACK MISR , ..

.

قول لنا رأيك في الكلام ده .. و هل لما جيت تفتح صيدليتك , راعيت نقطة أو أكتر من اللي اتقال ؟؟ .. و إيه أكتر نقطة شايف إنها ممكن تفرق معاك و انت بتفتح صيدليتك الجديدة بإذن الله ؟؟!!

.

#شيرالكلام ده بقى لو استفدت أي حاجة

أحمد الجويلى
التعليقات
المشاركةعلى مواقع التواصل الاجتماعى