قواعد ‫‏اختيارالكلية‬ الأربعون - أكاديمية الجويلى
إزاى تستفيد بـ 10 طرق مختلفة بعضويتك فى جروب First Pharmacology Course Online ؟؟
يونيو 13, 2016
حتى لا تشعر أنك صيدلى بطيخة
أغسطس 7, 2016
اظهر الكل

قواعد ‫‏اختيارالكلية‬ الأربعون

المشاركةعلى مواقع التواصل الاجتماعى

قواعد ‫#‏اختيار_الكلية‬ الأربعون (سحقا لـ ‫#‏التنسيق‬ ) .. بوست جاد شوية

1- ماتدخلش كلية انت مش حاببها

2- ماتدخلش كلية عشان برستيج أو مستقبل مضمون أو حتى من باب بر الوالدين

3- ماتستخسرش مجموعك العالى فى الثانوية و تدخل بيه – لا قدر الله – كلية مش بتحبها

4- ادخل الكلية اللى بتحبها حتى لو كانت قليلة فى نظر المجتمع

5- ياما دخلوا طب و طلعوا دكاترة فاشلين , و ياما دخلوا حقوق , و طلعوا محامين شاطرين

6- التنسيق مش عقبة حاليا .. ادرس اللى نفسك فيه رغم أنف التخين 

7- التعليم مابقاش فيه أسهل منه , و البركة فى الـ MOOCs (التعليم الأونلاين)

8- اسأل واحد أو أكتر من خبراء التعليم المفتوح من حبايبنا : Saad Lotfey / Ahmed Emad / Ibrahim Farouq / Adel Hasaballah

9- مش عشان جالك دور برد أو راحت عليك نومة أو اتظلمت فى امتحان واحد , أو ناس غشت و انت لأ , تقوم تسمح بضياع حلمك فى دخول كلية معينة ! .. دور ع الطرق المشروعة غير المعروفة للوصول , و تشبث بهدفك

10- تعرف إنك ممكن تدخل صيدلة فى مصر (بأى مجموع) من خلال السودان / أوكرانيا / روسيا ؟؟ .. لو مش مصدق , اسأل Mohamed Elbrawy .. 

11- لما تدخل كلية بتحبها , حتستحمل قرفها و غتاتتها ..

12- لو دخلت كلية لأى سبب تانى , حتخلى غيرك هو الشماعة اللى تعلّق عليها فشلك

13- مهما فشلت أو اتأخرت فى كلية بتحبها , مصيرك تنجح فيها برضه بإذن الله 

14- طظ فى المجتمع اللى بيفكّر فى تأمين معاشك و انت لسه عندك 18 سنة !!

15- ماتضيعش عمرك فى دراسة حاجة مش بتحبها 

16- ادرس الحاجة اللى ممكن تفيدك بعد كده فى سوق العمل

17- حدد من دلوقتى انت نفسك تشتغل إيه بعد التخرج .. و حتى من قبل التخرج 

18- مفيش كلية – مهما كانت سهلة – تخلو من التعب .. حتتعب حتتعب .. اتعب فى اللى بتحبه

19- ماتضيعش ترم أو ترمين فى كلية مش بتحبها على سبيل التجربة

20- مش لازم العصفور اللى باليد يكون خير من اللى ع الشجرة .. انفلونزا الطيور ملت البلد

21- لو كل الكليات بالنسبة لك سواء , فأهلا بيك فى نادى العاديين , ربنا ما يجعلك منهم

22- كنت حاتشل لما لقيت أم بتقول لبنتها تدخل طب , عشان يتقدم لها عريس بمقومات أعلى من لو دخلت إعلام !! .. المصيبة إن البنت نفسها تدخل إعلام !!! ..

23- تعبت فى الثانوية ؟؟ .. جهز نفسك لمرمطة أكتر أيا كانت كليتك ..

24- اللى يقول لك : ليه مش ناوى تدخل الكلية الفلانية طالما مجموعك يجيبها , قول له : مالكش دعوة

25- اللى يحاول يكرهك فى اختيارك , قول له : خليك فى حالك ..

26- اللى يجرب يقنعك باختيار غير اللى نويت عليه , قول له : انزل من على ودانى

27- ماحدش حيتحمل نتيجة اختيارك , إلا انت .. كلهم حيتخلوا عنك لو فشلت فى دراستك ..

28- ماتتعبش نفسك فى إقناع حد بإن مجالات العمل دلوقتى اتفتحت و اتغيرت عن من 5 سنين

29- مفيش حاجة اسمها كلية بتكسب أكتر من كلية .. كفاية الهبل ده الله يكرمك ! ..

30- ماتقارنش نفسك بحد فى كلية تانية , و لا حتى لو كان فى نفس كليتك .. انت متميز

31- ياما شفنا خريجى تجارة و مديرين بنوك .. و شفنا صيادلة مافلحوش فى شغلانة

32- كتابتك لورق التنسيق بالفعل مش نهاية المطاف , فيه اختراع اسمه التحويل

33- ماتخسرش والديك و ما تقاطعهمش لو الموضوع وصل لكده لا قدر الله ..

34- لو مش عارف إزاى تقنعهم ممكن تقرا ده  http://wp.me/p9ibpe-ps

35- لو خلاص نويت على صيدلة , يا ريت تقزقز ده http://wp.me/p9ibpe-sl

36- ارمى نفسك فى جروبات خاصة بكليتك ع الفيس , و اتعرف على عالمك الجديد

37- ابدأ من دلوقتى اعمل علاقات , و تقل أكونتاتك على LinkedIn و ع الفيس برضه

38- ماتفتكرش إنك لما تكتفى بدراستك فى كليتك – أيا كانت – حتعرف تشتغل حاجة !!

39- ارمى نفسك فى أعمال تطوعية و خيرية و اجتماعية , عشان تكتسب خبرات بجد 

40- فكر فى الكلام اللى فوق , و ماتنساش تعمل استخارة أكتر من مرة , و توكل على الله

‫#‏شير_لو_اقتنعت‬

‫#‏العلام_زى_الجواز_مش_بالغصب‬

 

.

أحمد الجويلى

التعليقات
المشاركةعلى مواقع التواصل الاجتماعى