قواعد "حضور المحاضرات" الأربعون .. - أكاديمية الجويلى
نصائح بخصوص الانجاب
نوفمبر 9, 2015
صيدلى مغترب ؟؟ .. اشترك فى برنامج الصيادلة المغتربين
ديسمبر 23, 2015
اظهر الكل

قواعد "حضور المحاضرات" الأربعون ..

المشاركةعلى مواقع التواصل الاجتماعى

1

خلينا نتفق على إن العلم بيتطور كل يوم .. و طرق توصيل المعلومة بتتغير ما بين فترة و التانية , و لكن تظل الطريقة التقليدية “المحاضر و الطالب” هى الأكثر شيوعا حتى الآن .. قاعة محاضرات .. سبورة تقليدية أو “white board” .. مقاعد خشبية معروفة .. و الطلبة قاعدين بيسمعوا فى اهتمام .. النهاردة مش حنتكلم عن اللى المفروض المحاضر يقوم بيه , عشان يوصل بمحاضرته لمستوى متميز من الكفاءة و الإفادة بالنسبة للطلاب .. و لكن حنتكلم عن الـ 40 قاعدة اللى ممكن ينفذهم الطالب للاستفادة بأى محاضرة يحضرها , و يخرج منها بأقصى درجة استفادة بإذن الله ..

ملحوظة قبل ما تبدأ : فيه كلمات مكتوبة بالخط العريض الغامق , زى كده .. دول فيهم كنوز إضافية بجانب المقال نفسه .. اضغط عليهم ..

.

1) استحضر نية طلب العلم و انت داخل المدرج أو القاعة ..

2) تخيّل عدّاد حسناتك و هو بيعدّ طول ما انت قاعد قدّام المحاضر ..

3) اختار مكان محدد ممكن تسمع و تشوف فيه المحاضر و السبورة أو الـ data show بشكل مناسب و واضح ..

4) خلّى موبايلك صامت عشان المكالمات المهمة ما تضيعش عليك , و فى نفس الوقت ما تعملش إزعاج للمحاضر أو للطلبة ..

5) اعرف معلومات عن محتوى المحاضرة قبل ما تدخلها , من أى مصدر مناسب , عشان تبقى متابع مع المحاضر قدر الإمكان ..

6) لو فيه أسئلة عندك , اعرف نظام عرضها .. ارفع إيدك و اعرض الأمر عليه باحترافية : دكتور لو سمحت , لو فيه أسئلة , ممكن نعرضها فى أى وقت , ولا بعد نهاية كل جزء , ولا لما حضرتك تسمح بوقت كافى لها , ولا فى الـ office hours الخاصة بحضرتك فى المكتب ؟؟

7) ما تفوّتش المحاضرة من غير ما تعرف طرق التواصل مع المحاضر , ابتداء من رقم تليفونه العام , و حتى الأكونت بتاعه ع الفيسبوك , مرورا بإمكانية تواجده ع الواتس أو الفايبر أو غيره من وسائل الوصول إليه ..

8) ما تحكمش على جودة المحتوى المقدم من أول 10 دقايق , و تغادر بعدها المحاضرة , أو تفتح تليفونك و تلعب subway , زى ما أغلب الحاضرين ممكن يعملوا , و لكن تعالى على نفسك شوية , و ادى نفسك فرصة , جايز الجاى أحلى ..

9) لو لقيت اللى جنبك – سواء صاحبك أو أول مرة تشوفه – من النوع اللكاك أو الرغّاى , قول له بصوت واطى و بكل حزم : خلينا نتكلم بعد المحاضرة .. و نركّز دلوقتى شوية ..

10) اسأل المحاضر – قبل أو بعد المحاضرة أو ع الفيسبوك – عن أفضل تطبيق عملى للمعلومات اللى حيقدمها , عشان تحس بأهميتها أكتر ..

11) حاول ما تكتبش كتير كل اللى الدكتور حيقوله , كده كده حيبقى فيه مصادر تذاكر منها , زى الورق اللى الطلبة بتحطه فى المكتبات أو غيره , و لكن ركّز على تدوين النقط المهمة فى المحاضرة

12) اتعلم طريقة تدوين اسمها “الخريطة الذهنية” أو الـ Mind Map , و دى كنا قدّمنا عنها أول فيديو نزل لينا ع اليوتيوب , تقدر تشوفه من هنا ..

 

و طبعا تقدر تشوف حاجات أحدث بخصوصها , عشان تطبقها أفضل , من هنا ..

 

13) بعد ما تدوّن أهم النقط فى المحاضرة فى صفحة واحدة , اشغل وقتك بعد العودة , أو فى مكتبة الكلية , بالبحث عن فيديوهات بخصوصها ع اليوتيوب .. و ركّز على فيديوهات الـ Animation .. و اللى حتخليك تستمتع أكتر بالنقط اللى دوّرت عليها ..

على سبيل المثال .. مرض السكر تقدر تشوف فيديوهات كتير مشوقة عنه في المقال ده 🙂 >>  http://wp.me/p9ibpe-y7

أما بقى لو لسه ما شفتش محاضرتنا عن أساسيات الـOTC و قواعده (Animation برضه ) 😉  تقدر تشوفها من الرابط ده
 

14) شيل من دماغك شوية فكرة إنك بتحضر عشان تنجح فى الامتحان النهائى .. و حاول تستمتع بالمعلومة المقدمة بعد ما تكون وصلت لأهميتها على المستوى العملى ..

15) مفيش معلومة مالهاش تطبيق و أهمية .. و لكن فيه معلومة لسه ما قدرناش نوصل لكيفية تطبيقها على أرض الواقع .. و جايز تكون أهميتها فى اللى لسه حيتبنى عليها من معلومات تطبيقية فيما بعد بمرور الوقت ..

16) لو حسيت إن المحاضر غلط فى نقطة معينة – و ده وااااارد جدا – ما تحرجهوش أو تحاول تعلّم عليه أثناء المحاضرة , .. روح له بعد المحاضرة , و نوّه له بخصوصها بينك و بينه , و لو قاوحك , ابقى هاتها له صح من مصدر سليم على النت و وريها له على موبايلك .. و لو قاوحك ساعتها , اعرف إنه مش عاوز يطلّع نفسه غلطان .. بس حيبقى عرف المعلومة الصح , و ده الأهم بالنسبة لك ..

17) الضحك أو الابتسام مفيد أثناء المحاضرة , لما يكون بتفاعل مع هزار بيقدمه المحاضر , و لكن فيما عدا ذلك , ممكن المحاضر يعتبره استهزاء بيه أو عدم انتباه للى بيحاول يوصله ..

18) لما تعامل المحاضر اللى بيقدم لك المعلومة كويس , ده مش نفاق أو مداهنة عشان يديك درجات أعلى فى الشفوى أو العملى , و لكنه من حسن خلقك , اللى بيدفعك لمعاملة الكل بشكل محبب و راقى ..

19) ما تشربش منبهات بحجة الرغبة فى عدم النوم , و التركيز أثناء المحاضرة .. نام بالليل و تعالى فايق .. مش العكس ..

20) عشان تركّز فى المحاضرة , حاول تقعد فى الصفوف الأولى قدّام عين المحاضر .. و ممكن بين المحاضرات تبقى تضرب واحدة سنيكرز ولا حاجة تديك شوية طاقة ..

21) ما تكتفيش بالمادة العلمية المقدمة داخل المحاضرة , و دايما خلّى عندك شغف و رغبة فى اكتساب المزيد , و ده حيفهمك نقط ممكن المحاضر نفسه ما يبقاش فاهمها كويس ..

22) ما تقارنش نفسك بحد .. اتعلم عشان تبقى فرد نافع , مش عشان تبقى أحسن من فلان أو علان ..

23) افتكر إن المدة الزمنية اللى جيت فيها لحضور المحاضرة فى عز البرد مثلا , فيه ناس غيرك مأنتخين فيها فى بيوتهم تحت اللحاف , و عشان كده لازم تطلع منها بأقصى استفادة ..

24) الناس المأنتخة ممكن تجيب تقدير أكبر منك .. ده بيحصل كتير .. و عشان كده قلنا من شوية , .. ما تقارنش نفسك بحد ..

25) مش معنى إن حد جاب تقدير أفضل منك , إنه يشتغل فى مجال أفضل منك , أو يبقى سعيد فى حياته أكتر منك , .. للمرة المليون , ما تقارنش نفسك بحد ..

26) لو الترم فيه 10 محاضرات فى المادة , المفروض يكون معاك فى نهايته 10 ورقات للـ 10 محاضرات دول , و دول يكون فيهم البهاريز الخاصة بكل محاضرة , و يتدبسوا فى فايل صغنن كده على قدهم , و يبقوا الخلطة السرية بتاعتك , و اللى المفروض ماحدش غيرك يفهمها ..

27) زوّد أى معلومات مهمة تاخدها من أى مصادر خارجية على الورق السرّى ده , باختصاراتك المعروفة بالنسبة لك , و اهتم بالتلوين – بس من غير أفورة – كما تنص قواعد عمل الخرايط الذهنية .. تقدر تقرا مقالنا عن إزاى تذاكر صح ؟؟ .. من هنا 

2

28) أسهل شىء هو اتهام الطرف الآخر – و هو المحاضر – بإنه مش بيقدر يوصل المعلومة أو إنه غير مقبول , .. أو أى اتهام آخر .. و لكن الصعب هو العمل على التحدى ده , و تحويله لصالحك كطالب , عن طريق تطبيق اللى بنقول عليه فى المقال ده ..

29) استخدم الـ social media فى دراستك .. و حاول تقول اللى استفدته من محاضرتك فى status ع الفيسبوك , و خليه تحدى مستمر بالنسبة لك ..

30) خد لنفسك صورة فى القاعة قبل المحاضرة , و نزّلها ع الـ Instagram , و اكتب شعورك قبلها , و ما تخافش م الحسد لما زمايلك يقولوا عليك دحيح ..

حاول تشوف الفيديو ده عشان تقتنع اكتر بالنقطة دي 😉

 

31) خليك فاكر إن المعلومة اللى بتثبت جدا , هى المعلومة اللى حتعمل لها share و غيرك يستفيد بيها معاك ..

32) صوّر فيديوهات selfie سريعة فى دقيقة أو دقيقتين بالموبايل , و فيها overview سريعة عن محاضرة النهاردة , و نزّلها على بروفايلك , ..

33) توقع – و ما تهتمش بأى – تعليقات سخيفة  ممكن تيجى من زمايلك الفاقدة , و اللى حيحاولوا يحبطوك عن تنفيذ أكبر قدر ممكن من القواعد دى

34) من الطبيعى إن يبقى فيه محاضر أفضل من محاضر , و لكن من المستحيل إن المحاضر الشاطر فقط هو اللى يقدم لنا كل المواد .. لازم يكون عندنا الرغبة فى التميز و تحدى الذات , بغضّ النظر عن جودة المحاضر , المفروض علينا , عشان نبقى ناجحين فى عملنا فيما بعد ..

35) اعمل group صغير ع الفيس أو الواتس لكل مادة من المواد , مع أفضل 5 أو 6 من أصحابك اللى بيحبوا المواد دى .. و اتقابلوا عليه كل يوم , و فيدوا بعض باللى بتدرسوه ..

36) اطلب من المحاضر أسئلة و إجاباتها بخصوص المحتوى اللى بيقدمه أو مراجع سهلة للاستزادة عن المادة العلمية .. و ما تخافش , مش حيحطّك فى دماغه أو يستقصدك فى الامتحانات .. بالعكس , حيفرح بيك قوى بإذن الله ..

37) نظّم وقتك و ما تضحيش بمحاضرات عشان خاطر حاجات تانية زى سكاشن مثلا أو غيره .. و لو محاضرة فاتتك , اعمل المستحيل عشان تعوّضها بأى طريقة تانية .. عشان لما ييجى الامتحان يبقى عندك 9 نصائح جويلية يجب أن تطبقها فى ليلة الامتحان

38) ما تسجلش المحاضرات صوتيا .. 1% فقط من الطلبة همّا اللى ممكن يعيدوا الاستماع للمحاضرات بانتظام بعد حضورها فى الكلية .. و ده غالبا عشان يعرفوا يفرغوها كويس و ينزّلوها فى المكتبة و يكسبوا من وراها فلوس , زى ما كنت انا باعمل على ايامى ..

39) تسجيل المحاضرات صوتيا – لو مش من اللى بينزلوها فى المكتبة – بيدّيك شعور زائف إن المحاضرة معاك , و تقدر ترجع لها فى أى وقت , فى حين إنها بتكون مسألة مملة جدا “أكتر من حضور المحاضرة نفسها” , و فى النهاية بتتمسح الملفّات الصوتية من الموبايل فى ساعة زنقة , عشان تفضّى مساحة كافية تاخد عليها حاجة تانية , مالهاش أى علاقة بالمحاضرات ..

40) تنفيذ أكبر قدر من القواعد دى ممكن يفيدك و يبقى فى ميزان حسناتك .. و لكن برضه نشرك لها على الاكونت بتاعك أو على جروب دفعتك ع الفيس أو حتى من خلال الواتس , ممكن يضاعف أجرك فى الآخرة , لما زمايلك المقربين ياخدوا بيه , و نتقابل كلنا فرحانين بالثواب الكبير بإذن الله , تحت ظل عرش الرحمن , يوم لا ظل إلا ظله ..

#أحبكم_فى_الله ..

.

أحمد الجويلى
التعليقات
المشاركةعلى مواقع التواصل الاجتماعى