خواطر جويلية عن فتح الصيدلية :) - أكاديمية الجويلى
30 نصيحة لتصبح أكثر ذكاءا و تميزا ^_^
يناير 27, 2014
طريقة رائعة تجعلك تكره التدريب الصيدلى بالإجازة
فبراير 1, 2014
اظهر الكل

خواطر جويلية عن فتح الصيدلية :)

المشاركةعلى مواقع التواصل الاجتماعى

خواطر جويلية عن فتح الصيدلية :

قبل ما تتخذ قرار فتح صيدلية جديدة خاصة بيك , لازم تفكّر – بعقل – فى شوية حاجات منطقية جدا , أتمنى إنك تاخد بالك منها ..

أولا : ما يسمى بـ #الفجوة_الاقتصادية .. يعنى المنطقة اللى ناوى تفتح فيها الصيدلية , تستحمل صيدلية جديدة من أساسه , ولا لأ ؟؟ .. هل عدد السكان فيها كبير للدرجة الكافية ؟؟ ولا المنطقة مكدسة أصلا بالصيدليات , و فتحك للصيدلية فى المكان ده حيكون فيه اقتطاع من نصيب الصيدليات اللى جنبك و خلاص ؟!!

ثانيا : حواليك دكاترة ولا لأ ؟؟ .. طبعا الأكسجين بتاع أى صيدلية , هو تواجد أطباء جنب الصيدلية , أو فوقها , و فى حالة تواجد أطباء بشكل كافى , ابدأ اسأل عنهم بشكل فاحص و دقيق .. إيه تخصصاتهم ؟؟ .. إيه الأدوية اللى بيكتبوها ؟؟ .. عندهم ضمير مهنى ولا حطوه فى الدرج ؟؟ .. و هكذا ..

ثالثا : القيمة المميزة اللى عندك .. يعنى هل عندك حاجة مش عند غيرك ؟؟!! .. شاطر أكتر فى الـ OTC و كده مثلا ؟؟ .. ولا بتعرف تعمل تراكيب مثلا , و الناس تيجى لها من آخر الدنيا ؟؟ .. ولا جامد فى تخصص معين يمكن علاجه , بشكل يخلق لك سمعة كويسة عند الناس ؟؟ .. ولا حسن المعاملة عندك , هو اللى ممكن يكون عامل الجذب للعملاء ؟؟ .. إلخ.

رابعا : قيمة المكان المادية .. يعنى تقدر تدفع فيه لحد كام ؟؟ .. و تتوقع كده – كمشروع تجارى – ممكن تجمّع اللى دفعته فيه , بعد كام شهر أو كام سنة ؟؟ .. و هل حتبقى مديون يوم الافتتاح ولا ممكن تكون الأمور مستورة معاك ساعتها ؟؟ .. خليك فاكر إن الموضوع مش بيقف على المكان و بس .. لا .. قيمة الدوا اللى ممكن تجيبه عشان تشتغل فيه , بتختلف على حسب طبيعة المكان (راقى – متوسط – شعبى .. إلخ) , و على حسب طبيعة الأطباء المتواجدين حواليك , و على حسب الإكسسوار اللى ناوى توفّره .. إلخ إلخ إلخ.

خامسا : الحرام – مهما زاد – بيكون قليل .. و مهما طالت فترته , مش بيدوم .. حطّ دى قدّام عينيك يا برنس .. والله أعرف ناس , الحرام عندهم شىء عادى , و لكن مفيش عندهم سعادة بنكلة , برغم إنهم أغنيا ! .. و ناس تانية , ماشية بالتيلة – زى ما بيقولوا – لكن الابتسامة دايما على وشهم .. و دول صيادلة , و دول صيادلة .. مش باكلمك عن كائنات من كوكب تانى يعنى ..

سادسا : الشراكة شىء جميل .. بس لما يكون فيه توافق خرافى , بين الشريكين (اللى الأفضل يكونوا صيادلة طبعا) .. يعنى توافق أخلاقى (الاتنين مش بيقصوا ترامادول) , و توافق علمى (الاتنين مستواهم متقارب , عشان ما يغيروش من بعض أو يعلّموا على بعض) , و توافق مادى (عشان ما حدش يعاير التانى بإن من غيره ما كانتش الصيدلية اتفتحت) .. و كل ده , عشان ما نسمعش خبر انفصالهم عن بعض قريّب .. لكن لو التقارب تحقق , فده بيكون أفضل بكتير , من فتح أنصاف صيدليات , بينهم و بين بعض خماشر تمناشر متر ولا حاجة !! ..

سابعا : تحب تضيف إيه بنفسك بقى ؟؟؟

أحمد الجويلى
التعليقات
المشاركةعلى مواقع التواصل الاجتماعى