تورم الأصابع في الشتاء | كما لم تقرأ عنه من قبل - أكاديمية الجويلى
إزّاي تبّطل سجاير | بدون أدوية | فى 27 يوم فقط ؟؟
ديسمبر 31, 2014
للصيادلة و طلبة الصيدلة فقط | 6 طرق مؤكدة لزيادة دخلك الإضافى يوميا ..
يناير 11, 2015
اظهر الكل

تورم الأصابع في الشتاء | كما لم تقرأ عنه من قبل

المشاركةعلى مواقع التواصل الاجتماعى

تورم الاصابع

تعالوا نفهم الموضوع خطوة بخطوة , عشان ما نحفظش كتير 🙂 ..

.
جسمنا له درجة حرارة معينة , و المفروض إنها تبقى ثابتة .. و من البديهى بالنسبة له إن يحاول يحافظ عليها و يمنعها من التقلب , عشان العمليات الحيوية فى الجسم تفضل شغالة بنفس كفاءتها .. التحكم فى درجة الحرارة , بيكون بأكتر من طريقة لو الجو المحيط بالجسم كان بارد .. منها مثلا , زيادة معدل الحرق , لإنتاج طاقة حرارية تتغلب ع البرد ده .. و منها كمان , وصول كميات أقل من الدم للأطراف , عشان هى اللى بتبقى معرضة للبرد أكتر من باقى الجسم .. و ده عن طريق تضييق الأوعية الدموية هناك .. Vasoconstriction يعنى ..
.
بمعنى إن الجسم – لو اعتبرناه بيفكر بنفسه – حيبدأ يوازن بين أهمية الإيدين و الرجلين بالنسبة له , و أهمية الأعضاء الحيوية اللى ما نقدرش نعيش من غيرها , زى القلب و الكبد و الكليتين و المخ طبعا .. و يبدأ يشتغل بالطريقة التانية (تقليل وصول الدم للأعضاء اللى مش مهمة و اللى ممكن يعيش من غيرها) , فتبدأ الأعضاء دى تصرخ من نقص وصول الأكسجين .. و يحصل الألم المعتاد فى الحالات اللى زى كده فى الأصابع ..
.
و لكن الأعراض لا تتوقف عند مجرد الألم .. و لكن أحيانا بنشوف الأصابع متورمة , و فيها حكة (أو هرش يعنى) , و ممكن لونها يغمق كمان , و لا قدر الله , الموضوع ممكن يوصل لجفاف شديد أو لغرغرينة !! .. يا ترى ده بسبب إيه ؟؟!! ..
.
نظريات كتير اتحطت لتفسير الموضوع ده , و لكن أقربهم لقلبى هو النظرية المرتبطة بالهيستامين .. لو جينا نفكّر بشكل منطقى , حنلاقى إن الأستاذ هيستامين بيخرج فعلا لما بيحصل نقص فى الأكسجين فى منطقة من المناطق .. (بدليل خروجه فى بداية مرض التهاب البواسير , اللى بيحصل فيه نقص فى الأكسجين برضه فى منطقة الـ Anal Sphincter ) .. المهم كمان إنه فعلا بيقدر يسبب الهرش اللى قلنا عليه (ده أهم علاماته) , و كمان بيسبب التورم اللى بيحصل , فى محاولة منه لتعويض الـ vasoconstriction , فيعمل توسيع غير مفيد للأوعية الدموية , يسبب ورم , و لكنه لا يسبب زيادة فى الـ blood supply للأطراف !! ..
.
و طبعا الجفاف الشديد و الغرغرينة , ممكن يحصلوا من استمرار نقص الأكسجين لفترات طويلة , بسبب إن صاحبنا مش مهتم بالحالة و مش بيعالجها .. و ده اللى بيحصل عند متسلقى الجبال الثلجية أحيانا بدرجة تضطرهم لقطع أصابعهم أثناء التسلق , بدون ما يحسوا بيها لإنها بتبقى متخدرة خلقة !!
.
طبعا احنا ما قلناش الكلام اللى فات ده , عشان ندردش سوا و خلاص .. و لكن عشان نطلع منه بالعلاج المفيد بإذن الله , كأفكار مفهومة , قبل ما يكون كلمات أو أسماء تتحفظ و خلاص .. تمام ؟؟ ..
.
الأفكار المقترحة للعلاج : ..
.
1) .. نحافظ ع الأطراف دفيانة , عن طريق عدم تعريضهم للبرد , و المحافظة على تغطيتهم بالجوانتى أو الشراب الصوف , اللى ما يخليهمش بردانين , و بالتالى الدم يفضل رايح جاى عليهم , و هو متطمن من إن درجة حرارته مش حتقل بإذن الله ..
.
2) .. نستخدم أدوية بتوسع الأوعية الدموية الطرفية غصب عنها , زى اخواتنا الـ CCBS و منهم الحاج Amlodipine و الأسطى Diltiazem .. و دول ممكن يسببوا شوية صداع و Ankle Edema كعرض جانبى غير مألوف !! .. و ممكن برضه نستخدم عمنا “ترينتال 400 ق” مثلا , و اللى بيحتوى على مادة الـ Pentoxiphylline .. الأخ ده ممكن نستخدمه للبالغين مرتين يوميا مثلا , و بيجيب نتيجة خلال أيام معدودة ان شاء الله من بدء العلاج ..
.
3) .. التسخين المتقطع .. يعنى نحط إيدينا أو رجلينا فى مية سخنة لنصف ساعة مرتين يوميا أو 3 مرات , .. و ده ممكن يجدد الدورة الدموية كويس فيهم إن شاء الله .. يعنى مش عاوزين ننسى إن التسخين لمنطقة معينة فى الجسم , بيزود لها الـ Blood Supply على طول الخط , عشان الجسم – لو اعتبرنا إنه بيفكر برضه – بيعتبر إن الحرارة دى مصدر من مصادر الطاقة , يقدر يحصل عليه , من خلال إرسال كميات من الدم للمنطقة اللى بتتسخّن دى ..
.
4) .. الكريمات الموضعية , زى ثرومبوفوب , أو حتى مووف مساج , ممكن تزود الـ Blood Supply بسهولة إن شاء الله , و ممكن نستخدمها فى الأوقات اللى ما نقدرش نسخّن فيها أطرافنا , زى لو كنا فى الشغل مثلا ..
.
5) و أخيرا .. و أحد النقط اللى ممكن تفرقك عن أى صيدلى تانى , أو حتى طبيب أوعية دموية بإذن الله , هو علاج الانيميا اللى فى أغلب الأحيان بتكون موجودة عند المريض أو المريضة .. و بتزيد الحالة سوءا .. و ده شىء منطقى طبعا !! .. لإن لما يكون الدم اللى فى الجسم نفسه قليل (فى أنيميا نقص الحديد مثلا) , ساعتها حنضطر للحفاظ علي حرارته أكتر و أكتر , غير لما يكون عندنا وفر منه , و نقدر نبعت منه للأطراف كويس , من غير ما القلب و المخ و باقى الأعضاء المهمة يحسوا بفرق !! ..
.
6) .. لازم نقول برضه إن الجراحة ممكن نفكر فيها لو كل الحاجات دى ما جابتش نتيجة .. و ممكن نستخدم الـ Botox , كوسيلة حديثة , بدأ استخدامها فى 2009 !! ..
.
و خلينا نقول فى النهاية , إن اللى قلناه دلوقتى ده , بيستمى أحيانا بـ Raynaud’s Disease , على اسم العالم الفرنسى اللى وصفه لأول مرة , موريس رينود , و اللى وضع نظريات كتير لشرح أسبابه , و اللى كلها بتوصل إلى نقص الـ Blood Supply للأطراف , و منها أمراض سابقة (زى الأنيميا / الروماتويد / .. إلخ) .. أو أدوية تؤخذ لفترة طويلة (زى الـ Beta Blockers / Bromocriptine / Sulphasalazine / .. إلخ) .. و ممكن كمان الوظيفة , زى لو كانت بتتضمن العمل فى جو بارد , أو عمل اهتزازات , زى العمل باستخدام الحفارات فى رصف الشوارع مثلا , و اللى ممكن برضه تؤثر على وصول الدم للأطراف !! …
.
و بعد ما قريت الكلام ده , يهمنى إنى أفكّرك بإنك لو استفدت منه حاجة , يا ريت تضغط Share , و تحط فى بالك نية نشر العلم .. اتفقنا ؟؟
.
التعليقات
المشاركةعلى مواقع التواصل الاجتماعى