الإنترفيو .. بين الحقيقة و الأوهام - أكاديمية الجويلى
عن ‪#‎Devarol‬-S كمان و كمان !! ..
يوليو 31, 2014
5 يجب عليك أن تتجنبها إن كنت مريضا بالحساسية ..
سبتمبر 22, 2014
اظهر الكل

الإنترفيو .. بين الحقيقة و الأوهام

المشاركةعلى مواقع التواصل الاجتماعى

على مدار حياتى العملية كلها , أكرمنى الله إنى ماحتاجتش إنى أخوض تجربة المقابلة الشخصية (أو الإنترفيو يعنى) , بشكل رسمى , إلا مرة واحدة , و من خلالها , و بمساعدة بعض من الدراسة , فى علم النفس و التسويق , بجانب سؤالى لعدد من المسئولين عن القيام بالمقابلات الشخصية فى الشركات و المصانع , بشكل ودى , عن اللى بيسألوا عليه أو بيحتاجوه من المتقدمين للوظيفة , .. من خلال كل ده , خرجت بشوية مفاهيم , ممكن تكون حديثة شوية , و لكنها حقيقة جدا , تجاه “بعبع” المقابلة الشخصية , و اللى ممكن تكون ناس كتير فاهماه غلط للأسف .. مع كامل احترامى للجميع طبعا ! ..

فى المرة اللى خضت فيها التجربة , ما كانش الهدف من وراها إنى أشتغل فى الشركة اللى رحتها , و لكن كان الهدف هو خوض التجربة و فقط ! .. و الكلام ده كان من حوالى 3 سنين .. و كنت رايح أشوف إيه اللى بيحصل فى المقابلات الشخصية اللى بيقولوا عليها دى !! .. و إيه اللى بيتكلموا فيه فى الأوض المقفولة عليهم دى ؟!! .. و ليه ناس بتطلع فرحانة ؟؟ .. و ناس بتطلع متضايقة ؟؟ .. و هل الموضوع عامل زى امتحانات الشفوى اللى كنا بنتمرمط فيها فى الكلية , ولا فيه بينهم اختلافات ؟؟!! .. لحد ما اكتشفت الحقيقة و مدى بعدها عن الوهم و الالتباس اللى ممكن ما ناخدش بالنا منهم !! ..

و خلينا نبدأ بالأوهام ! ..

  • أنا لازم أتقّل الـ CV بتاعى : ..

أعرف ناس كتير بتفكّر بالطريقة دى .. و يتوقعوا إن كل ما كان الـ CV مبطرخ و متكلّف , و متزوّق من جوه , كل ما كان ده سبب فى قبولهم للعمل داخل الشركة !! .. لدرجة إن فيه ناس بتصوّر نسخ من كل شهاداتها اللى حصلت عليها , من دورات و دبلومات و خلافه , و تحطها فى ملفّ مع الـ CV , بحيث إن شكلهم يبقى عامل زى دفتر السجل المدنى كده .. حاجة محترمة يعنى ! .. و الحقيقة إن كل ده مالوش أى داعى .. سعادتك لازم تعرف إن اللى بيشوف الـ CV بتاعك , المفروض إنه يجيب قرارها فى 30 ثانية بالكتير , عشان لو قعد فى قراية كل CV لمدة 5 دقايق بس , (مع العدد المهول المتقدم للعمل) , ممكن ما يخلصش فى سنته , و احتمال يستقيل !! .. و لكن هو بيبقى له معايير بيحكم عليها فى الـ CV , عشان يختار على أساسها اللى حيخوض معاه الإنترفيو .. و من المعايير السريعة دى , 10 نقط لازم تحطهم فى بالك :

  • الهندام الواضح للورقة نفسها
  • إنها تكون فى ورقة واحدة قدر الإمكان
  • إنها تحتوى على أهم التفاصيل باختصار
  • وجود أهم المحطات الحياتية – مش كلها يعنى ..
  • وجود مراجع يمكن اللجوء إليها للتأكد من صدق المحتوى
  • مافيهاش أخطاء إملائية أو نحوية
  • الصورة فيها تكون رسمية قدر الإمكان
  • الخط يكون مقروء بوضوح .. مش منمنم ولا مجعلص
  • ما تكونش طفولية , يعنى ماحدش يلزق ستيكر ميكى أو بطوط
  • إنها تكون باللغة الأنسب للشركة .. لو شركة دوا : إنجليزى .. لكن ما ينفعش أقدّم للعمل فى مجمع اللغة العربية , و الـ CV يكون إنجليزى برضه !! ..
  • الشهادات المعتمدة أهم حاجة ..

خدعوك فقالوا : الشهادات المعتمدة لها لازمة فى الـ CV (بالتحديد لو كانت معتمدة من وزارة الخارجية) !! ..

يا سيدى الفاضل , الشركات عرفت الفولة خلاص , و حطّّت إيدها ع البلف , .. و فهموا إن اعتماد أى شهادة , بييجى بالفلوس و خلاص .. و إن الشهادات نفسها , ممكن ما يكونش وراها أى علم ممكن تكون حضرتك اكتسبته .. لإنك فى الكورسات اللى حصلت على شهادتها , ممكن تكون قعدت ورا مثلا , أو ماستفدتش أى بتنجان فى أثناءها .. و على هذا الأساس , ما تتوقعش إن الشركة حيفرشوا لك الأرض ورد , لمجرد إن معاك حفنة من الشهادات المعتمدة , من برعى أكاديمى , أو فتكات إنستيتيوت !! .. لا يا معلم .. انت حتتفحت عادى , زيّك زى غيرك , و ربما أكتر !!! ..

  • الواسطة و المعارف بتجيب من الآخر ..

انسى يا عمرو .. آاااااااخر الواسطة إنها تخليك تدخل الإنترفيو , برغم إن الـ CV بتاعك واقع ع الآخر .. و لكن صاحب الشركة مش حيعيّن معارفه و حبايبه فيها , و فى الآخر يخسر بسببهم الجلد و السقط , و يلفّ يشحت , بسبب إنه لازم يجامل لؤى ابن خالة مراة أخو ابن عمه !!! .. الفكر الرأسمالى دلوقتى , بقى الأهم فيه هو إنك تشتغل , فتكسب .. و المعارف بقت آخر حاجة ممكن تفكّّر إنك ممكن تشتغل من خلالها فى أى مكان محترم !! .. و حتى لو اشتغلت , لو ما أثبتتش جدارتك فيها , ابقى قابلنى لو عمّرت فى المكان ده يا زعيم .. همّا أسبوعين اتنين , و تلاقى نفسك فى الشارع , لا قدر الله .. و ساعتها , تبقى الواسطة برضه بالنسبة لك كانت زى قلتها !! ..

  • حاحفظ أسئلة كتاب (كيف تجتاز الإنترفيو ؟؟) ..

أفضل طريقة عشان تخسر بيها الـ interviewer اللى حيقوم معاك بالمقابلة الشخصية , هى إنك تعامله زى الإنسان الآلى , اللى بيظهر له إجابات محفوظة على أسئلة محفوظة من قبل كده !! .. و ده ببساطة , لإن المدير اللى قدّامك (أو موظف الـ HR اللى حيعمل معاك المقابلة) , مش إنسان آلى برضه , و إنما كائن بشرى , يعيش و يتعايش .. و لازم تتعامل معاه ع الأساس ده , .. و لو عاوز تفهم قصدى أكتر , و تضحك من قلبك كمان , شوف الفيديو ده !! ..

 

  • بتاع الـ HR لسه جاى حالا من الفضاء

خلينى أتفق معاك كمان , على إن الراجل اللى حتقابله , عايش فى مصر برضه , و عارف آخر التطورات , و زى ما عرف إن الشهادات ممكن تتشرى و تنضرب , حيعرف برضه إن الإنسان البشرى كائن ممكن يكدب .. و عشان كده , ما تحاولش تكدب عليه , لإنه حيفقسك بسهولة .. و دى شغلته على فكرة !! .. فماتحوّرش عليه , و تخترع قصص خيالية , عن بطولات و أمجاد ما حصلتش , عشان ده حيكون أقصر طريق لباب الأوضة , مع الاستماع لكلمة “طب اتفضل , و حنبقى نتصل بيك” !! .. و فى الحالة دى , اعرف إنك اتقلبت يا معلم !! ..

أما بقى لو جينا نتكلم ع الحقائق , تجاه الفكرة على بعضها , فممكن نبدأ بيها كالآتى : ..

  • اعرف انت جاى ليه ..

ادرس المكان اللى انت داخل عليه كويس , و حدد – من قبل المقابلة – إن كان التوصيف الوظيفى الخاص بشغلتك , حيكون مناسب ليك ولا لأ .. و ما تفتكرش إنك حتتعلم كل حاجة لما تشتغل ! .. انت ممكن تتعلم عدد من الحاجات , و لكن مش كلها .. و عشان كده , لازم تكون مذاكر كتير عن منتجات الشركة دى , و أهم عيوبها و مميزاتها , عشان تعرف تخترق المقابلة بشكل حاسم , و تسوّق لنفسك بنجاح عند الـ interviewer بتاعك ..

  • خليك على طبيعتك ..

اعرف ناس كتير بيتكلفوا قوى أثناء المقابلة الشخصية , و ده بيقلب عليهم بالعكس , فبيتوتروا مع أقل سؤال ممكن يحسوا إنهم مش عارفين إجابته , أو يعرقوا جامد , و تبدأ ابتسامتهم تبقى أشبه بابتسامة مريض التيتانوس المتشنجة , لا قدر الله !! .. لا يا معلم .. خليك كوول .. أى نعم لازم تروح و انت لابس هندام كويس (الحتة اللى ع الحبل يعنى) , و مظبّط نفسك بشكل رسمى , و بدلة و كرافتة , و كلام عالى (بالذات لو كانت الـ interviewer واحدة ست , عشان الستات بياخدوا بالهم من الحاجات دى قوى) .. و لكن لازم تكون واثق فى نفسك , بشكل يخليك بتتكلم بنفس تون صوتك الطبيعى , و نفس ابتسامتك العادية المحببة لكل معارفك .. , عشان تغيير الكلام ده فى المقابلات الشخصية , ممكن يكون له تأثير سىء جدا على تقييمك كحد بيسوق لنفسه داخل الشركة !! ..

  • الصدق منجاة

مرة واحد صاحبى , الـ interwiewer قال له : لو خيّرتك بين ولاءك لشركتك أو ولاءك لجيبك .. تختار مين ؟؟!! .. فرد بدون تفكير : ولائى لجيبى طبعا يا افندم .. فابتسم الراجل , و قال له : تمام تمام .. و كمّل معاه باقى المقابلة بنجاح و عيّنه فى الشركة ! ..

الشاهد إن صاحبى كان ممكن يتردد شوية , و يفتكر إنه لازم يثبت ولاؤه للشركة بشكل مثالى , حتى لو كان غير اللى حينفذه فى المستقبل , و يقول إجابة عكسية , و لكن الطبيعة البشرية ضد ده كليا فى الظروف الطبيعية .. و ده اللى احترمه الراجل فى صاحبى لما وضّح له ده ببساطة , و بدون مواربة أو مداراة !! ..

و على العكس , ناس كتير بتكدب فى أسباب خروجها من شركات سابقة , أو حتى فى فترات العمل فى أماكن , و مدى تباعدها عن بعضها , عشان يحسس اللى قاعد معاه , إنه ما بيفوتش يوم من غير ما يشتغل , أو إن سمعته السابقة كانت زى البرلنت مع اللى كان بيشتغل معاهم , و إنه سابهم مثلا , لإنه لقاهم مش بيصلوا الفجر حاضر !! .. ده على أساس إن أخينا مش بيقوم من على سجادة الصلاة عندهم فى البيت !!! .. و هو غير كده تماما !!! ..

  • الخبرات أهم 1000 مرة من الشهادات

من أهم الصفات اللى الـ interviewer  عاوز يتأكد إنك بتتمتع بيها , هى القدرة على العمل تحت ضغط , و إمكانية العمل الجماعى , و تنفيذ الأوامر باحترافية , و القدرة على حل المشكلات , و حاجات كتير , من رابع المستحيلات إنك تحصل عليها من خلال الكورسات النظرية , اللى عليها شهادات , حتى لو مختومة و معتمدة من البيت الابيض أو من الكريملين !! .. الصفات دى بتظهر و بتبان , لو حضرتك ليك فى العمل الجماعى .. يعنى تنظيم إيفنتات .. اشتراك فى جمعية خيرية .. المشاركة فى ندوات أو مؤتمرات علمية .. حتى لو كنت فى عشيرة الجوالة أيام الكلية , أو الإذاعة المدرسية , أيام المدرسة , فكل ده “أبرك 1000 مرة” , من عشرومية شهادة ممكن تحطها فى الـ CV , أو تكتب إنك حصلت عليها .. لإن هو ده اللى الناس عاوزاه منك فى الشركة , مش مجرد ورق مختوم و خلاص !! ..

فى مرة باسأل أحد حبايبى فى المجال ده , و كان بيعمل إنترفيوهات برضه مع ناس عاوزة تشتغل عنده فى الشركة , فقال لى : أنا لما بييجى لى حد عاوز يشتغل , بيكون من أهم أسئلتى معاه : بابا بيشتغل إيه ؟!! .. فلما استغربت عن سر السؤال , شرح لى , إنه من خلال السؤال ده , يقدر يعرف بالتخمين , إن كان أخينا “عيشته مرتاحة” , و مش حيقدر يستحمل المرمطة و الأوامر و تنفيذها فى الشغل , و حيسيب الشغل و يمشى مع أقل ضغط , ولّا ولد مجدع , و مش حـ”يكاكى” من أول مسئولية تتحط على كتافه فى الشغل .. و دى النظرية يا سادة !! ..

  • اثبت ولاءك و قدرتك على العمل

ده من أهم الحاجات – إن لم يكن أهمها على الإطلاق – اللى صاحب الشغل عاوز يتأكد – خلال المقابلة الشخصية – إنها عندك , و برضه مش بنقول لك إنك تتكلفها , و لكن تتعلمها , .. يعنى تثبت لصاحبنا فى الشركة إنك تقدر ترفع من مبيعاتها و تخليها تكسب بشكل أو بآخر .. اعرض فكرك تجاه الشغل , بشكل ما يسببش إحراج , و لا يطلّع صاحب الشغل غبى مثلا , و فى الحالة دى حيعرف إن قدّامه كنز ما ينفعش يضحى بيه أو يركنه على جنب و ياخد غيره للعمل فى الشركة ! .. اقنع صاحب العمل إن أحد أحلامك كان إنك تشتغل فى المكان ده , بشكل يثبت له – ضمنيا – إنك مش حتسيبه فى أى وقت , لمجرد ظهور فرصة فيها مكسب أكتر ليك و خلاص !! ..

و أخيرا .. اتعلم صح و طوّر نفسك صح , عشان تكون جدير بأى مكان تشتغل فيه .. و نمّى مهاراتك بشكل تطبيقى , يخلّيك أقدر على التعامل مع عدد أكبر من أنواع البشر , أو تقدر تقوم بمهام أكتر , لو تم تنفيذها منك إن شاء الله ..

أتمنى إنى أكون أفدتك النهاردة بشكل تطبيقى .. و لو المقال عجبك , يا ريت ما تترددش فى نشره , للإفادة للجميع ..

أحبكم فى الله

تابعنا على الفيسبوك , بالضغط على الاسم ده   ^_^ ..

أحمد الجويلى

التعليقات
المشاركةعلى مواقع التواصل الاجتماعى