أهم 4 حاجات المفروض يتواجدوا في الـ CV بتاعك !! - أكاديمية الجويلى
7 أنواع من الأشخاص ماينفعش يحضروا معانا في دوراتنا
يونيو 20, 2017
اظهر الكل

أهم 4 حاجات المفروض يتواجدوا في الـ CV بتاعك !!

المشاركةعلى مواقع التواصل الاجتماعى

أثناء تصفحي لبريدي الشخصي , لفتت انتباهي الرسالة العزيزة دي .. و لما نشرتها على الـ Profile الخاص بيا , لقيت أغلب الناس حابّة إنها تعرف الإجابة .. و عشان كده , قررت أقدّم لحضراتكم وجهة نظري .. و لكم مطلق الحرية في قبولها أو رفضها ..

في رأيي الخاص , فيه 4 حاجات لازم يكونوا موجودين في الـ CV الخاص بيك .. حنقول إيه همّا , و نقول إزاي تحصل عليهم بإذن الله ..

  • اللغة الإنجليزية

عشان تشتغل في أي مكان دلوقتي , لازم يكون معاك انجليزي .. ماينفعش تشتكي من إنك لسه لم توظّف , و انت مش بتعرف تقول كلمتين إنجليزي على بعض .. الغلط من عندك برضه .. معايير الدنيا دلوقتي كده .. الهندي و الباكستاني و الفلبيني , بقوا يعرفوا يتكلموا إنجليزي لبلب , و انت لسه مكتفي بلغتك الأم , و حتى لما تحاول تتكلم بيها , ممكن ما تعرفش تعبّر كويس !! ..

أنا مش حاقول لك روح المكان الفلاني , ولا احصل ع الشهادة العلّانية .. كل الكلام ده ممكن تكسّل عنّه , و لكن أنا حادلّك ع الزتونة من خلال 4 طرق سحرية , نوّهنا عنهم في بوست سابق على بروفايلنا الشخصي قبل كده , حاقول لك تعمل  إيه للحصول عليهم .. و لو مستعجل , اليوتيوب قدّامك , حتلاقيه معزوق بدروس تحدث الإنجليزية بطلاقة , و لكن ابقى قابلني لو كمّلت 4 أيام على بعض !! ..

  • قابلية التعلم

قالوا كتير قبل كده إنك لازم تاخد كورسات كتير , و تملا الـ CV بتاعك بشهادات تملا العين و كده .. و لكن اسمح لي أصدمك بإن مش ده الهدف من ورا الكلام ده .. لو حطّيت نفسك مكان الـ HR manager اللي بيعمل معاك الـ interview , حتكتشف إن الهدف من ورا كل الكورسات اللي مكتوب إنك درستها , هو إثبات إن شخص قابل للتعلم .. عندك استعداد إنك تكون life-long learner , مش إنك تخلّص الكلية من هنا , و ترفض تبصّ في ورقة بعد التخرج !! .. و قبل ما بتتشاف شهادات الكورسات دي , بتبصّ على عناوينها , و بيتفحص مدى قربها أو بعدها من الـ career اللي جيت تتكلم عليه ..

مثال : يا فرحتي لما تكون واخد 15 كورس في التسويق , و انت رايح أساسا تقدم على شغل كـ Quality Control في مصنع !! .. فهمت قصدي ؟؟!! .. لازم تثبت في الـ CV , إن اللي درسته ككورسات تكميلية , بيرمي في اتجاه الشغل اللي انت ناوي عليه ..

لما بيتبصّ على جزء الكورسات اللي أخدتها , بيتقاس مدى قدرتك على اختيار الدورة المناسبة اللي تفيدك , و تجنب الهري اللي ممكن يوقّعك لو اتشاف في الـ CV بتاعك .. أعرف أصدقاء تواصلوا معانا , بعد ما اتعيّنوا في سلاسل معروفة و شركات عريقة , لمجرد إن الـ interviewer شاف في الـ CV , إنهم حضروا معانا دورة من الدورات اللي حنقدمها في El-Gewaily Tour 2017 , أو لقاهم اقتنوا باقتنا التدريبية Learn Pharmacy At Home .. و على العكس , ممكن الـ Interview يخلص قبل ما يبدأ , بمجرد ما نقرا في الـ CV إن حضرتك حاصل على الدبلومة المصغّرة في علوم الشاكرا و الميتافيزيقا و ما وراء الطبيعة !! .. إحنا مالنا بالحاجات دي بس ؟؟!! ..

اهتم جدا بالـ MOOCs , أو التعلم أونلاين عن بعد يعني .. من خلال المواقع الشهيرة زي Coursera و Udemy و Edx .. النقطة دي بتبيّن إنك واد خلاصة , و تعرف تدرس لوحدك , و باحث شاطر عن المعلومة ..

  • القيادة و الانقياد و العمل في ظروف صعبة

إوعى تفتكر إن الـ interviewer بياخد بالكليشيه المحفوظ بتاع إنك بتعرف تشتغل تحت ضغط , و إنك حد طموح , و إنك قادر ع القيادة , و الكلام ده كله .. ده يبقى Interviewer هاوي لا مؤاخذة !! .. لكن الـ Interviewer العنتيل , عاوز يشوف ما يثبت الكلام ده بعينيه داخل الـ CV , زي إنه يشوفك شاركت في تنظيم events قبل التخرج .. اشتركت في أعمال تطوعية .. انضميت لجمعيات خيرية .. اتمرمطت في معسكرات كشافة .. أو حتى ع الأقل سافرت كتير و اتعرضت لمواقف غير معتادة في حياتك الطبيعية .. كل الكلام ده لازم تقوم بيه أثناء فترة دراستك الجامعية , قبل ما تعرض الـ CV بتاعك على حد , لإنه بيثبت إنك اتعلمت المهارات دي بشكل عملي .. و بالمناسبة , إوعى تكتفي بإنك درست الكلام ده في كورسات أو محاضرات نظرية .. أرجوك بلاش .. الحاجات مهارات عملييييييييية , بتيجي بالممارسة و الاحتكاك و إنك ترمي نفسك في بحر التعامل مع الناس , في ظروف مختلفة .. اتفقنا ؟؟

  • أمارات الاهتمام و الالتزام

عشان تتعيّن عندي , لازم يكون الـ CV بتاعك outstanding .. أنا بابص ع الـ CV في 3 ثواني , عشان أحدد إذا كنت حاتصل بصاحبه ولا لأ .. أغلب الـ HR Managers بيقولوا كده .. و معاهم حق بصراحة .. لما يكون متقدم 1000 واحد , و المفروض يتم الاختيار من بينهم , فمن الطبيعي إنك تمر في 3 ثواني , لو كنت عــــــــــــــــــــادي .. و الحل ببساطة , إنك تكون متميز بالـ CV بتاعك .. يعني ببساطة يكون مطبوع بالألوان .. بجودة عالية .. الصورة واضحة .. بابتسامة معتدلة .. ألوانك متناسقة .. الخط واضح … مفيش أخطاء مطبعية (خلي حبايبك يراجعوا معاك) , ولا إملائية (خلي مدرس الإنجليزي يراجع معاك) .. الورقة مش متكرمشة .. بياناتك سليمة .. إيميلك رسمي مش عيالي .. كل الحاجات دي بتبيّن إنك مهتم بالحصول ع الوظيفة , و حتكون ملتزم فيها , زي ما التزمت بعمل CV محترم .. و احنا كتبنا قبل كده مقال عن ‫‏إزاى تكتب CV بالطريقة الجويلية‬ ؟؟!! .. ممكن تقراه برضه و تدعي لنا ..

و لكن بعد كل ده , لازم أقول لك حاجة مهمة جدا ..

كل مكان بيتقدم له الـ CV الخاص بيه .. إوعى تقدم نفس الـ CV مرتين , على أساس إن شخصيتك ثابتة و ماحصلش فيها تغيير .. لا يا سيدي الفاضل .. احنا اتفقنا قبل كده , على إننا بـ “نقيّف” الـ CV على مقاس المكان اللي احنا رايحين نقدمها له .. فيه شركات بيبقى معروف عنها إنها بتعيّن أصحاب الخبرات القليلة , من الخريجين الجدد يعني , عشان مايبقوش overqualified بالنسبة لهم , و يقدروا يعلّموهم على إيديهم و يشربوهم الصنعة , بدون تعارض مع خبرات سابقة عند المتقدم للوظيفة .. في الحالة دي , المفروض تقوم بأغرب تصرّف ممكن تتخيّله , ألا و هو إنك حتشيل عدد كبير من الكورسات اللي درستها من الـ CV , و تسيب أقل عدد ممكن , بشرط إنه يكون مرتبط باللي حتروح تشتغل فيه ..

دلوقتي مش ناقص حضرتك , إلا الطريقة اللي نوّهنا عنها في بداية المقال , بخصوص تعلم اللغة الإنجليزية .. و دي ممكن تحصل عليها ببساطة , من خلال اتباع الخطوات الآتية ..

  1. انشر المقال ده Public على بروفايلك الشخصي ع الفيسبوك , و قول فوقه أهم حاجة استفدتها منه ..
  2. خد screenshot بالموبايل للبوست على بروفايلك , بعد ما ينزل عندك ..
  3. ابعت لنا الـ screenshot دي على خاص صفحة Learn Pharmacy At Home ع الفيسبوك , و بعدها كود “القوة الرباعية لتعلم الإنجليزية” , مش أكتر من كده , .. و احنا حنبعت لك الطريقة لحد عندك , خلال أقل من 24 ساعة بإذن الله , من غير ما تدفع ولا مليم ..

و ربنا يقدرنا على فعل الخير 🙂 ..

أحمد الجويلى 
التعليقات
المشاركةعلى مواقع التواصل الاجتماعى